Ginapasubmit sang provincial government sang Negros Occidental ang Bacolod City Water District (BACIWA) Prime Water sang Letter of Intent (LOI) matapos nga nakabaton ang provincial government sang impormasyon nga interesado ang utility company nga mag-avail sang bulk water project sang probinsya.
Suno kay Provincial Administrator Atty. Rayfrando Diaz, sa meeting sang BACIWA nagpabutyag ini sang interests sa pagbakal sang tubig sa probinsya.
Apang gin-require sang probinsya ang BACIWA Prime Water nga mag-submit sang LOI nga pirmado sang mga board of directors sang Prime Water agud mangin official ang tinutuyo.
Lantawon man suno kay Diaz kun maabot man gid ang nasambit nga papel kag sa tion nga magaabot gid ang Letter of Intent sang BACIWA kag Prime Water agud nga makahimo sang nagakaigo nga adjustments.
Ginpahayag man sini nga ginadihon na sang consultants sang probinsya ang investors forum nga patigayunon sa bulan sang Hunyo.
Suno pa diri, nakahinun-anon naman ini sa mga bulk water projects proponents sa private sector kun sa diin nagpasa naman sang mga proposals sa probinsya sa paglaom nga madayon ang proyekto.
Madumduman nga nagpahayag ang BACIWA nga indi sila interesado bangud may kuhaan pa man sila sang tubig sa sulod sang tatlo tubtub apat ka tuig.
Ginpahayag man ni Diaz nga welcome development ang pagpabutyag sang Bacolod City Water District (BACIWA) Prime Water sang interests sa pag-avail sang nasambit nga proyekto.
