Ginpahayag sang Chairperson sang Board of Directors sang Bacolod City Water District (BACIWA) nga nagakoordinar ang pamunuan sang Hiraya Water Corporation para sa ila nga mga measures para sa ginapaabot nga El Niño.
Sa interview sang Bombo Radyo Bacolod kay Atty. Sonya Verdeflor, nagakoordinar ang Hiraya Visayas Area Head Farrah Monteclaro sa BACIWA para sa mga tikang nga himuon para sa pagsiguro sang water supply apisar sang El Ninio.
Suno kay Verdeflor, ang ginatutukan sa karun sang nasambit nga water concessionaire ang non-revenue water.
Ini ang water supply nga wala nagalab-ot sa mga konsumidor matapos nga ini ang nagakauyang bangud sa mga leak sang water pipes.
Suno sa Chairperson sang Board sang BACIWA, sadtong sa management sang PrimeWater pa nagdangat sa 45 percent ang non-revenue water apang sa karun sa Hiraya, nagdangat na lamang ini sa 40 percent.
Dako sagihapon apang nabuhinan bisan paano kag ginatinguhaan man sang water concessionaire nga mapanubo pagid ang non revenue water paagi sa leak detection repairs.
Nagakoordinar man sila sa Department of Public Works and Highways (DPWH) kag City Engineers Office agud masiguro nga wala sang madalasa nga mga water pipes sa ginapatigayon nga road repairs.
Suno kay Verdeflor, nagaamat amat naman ang Hiraya sa pagilis sang mga water valves sa linya sang tubig.
Isa man sa mitigating measure amo ang pag-drill para sa water wells bilang back-up plan sa tion nga magnubo na ang water level sang mga suba nga ginakuhaan sang tubig sang water supplier nga Bacolod Bulk Water Inc. (BBWI).
Dugang pa sini nga may bahin ang ciudad nga mahimo makakutkot agud makuhaan sang water source.
Suno diri, bangud nabatyagan na ang pagnubo sang water level sa water source ginalantaw nga magadangat pa sa 7 million liters per day nalang ang mahatag nga water supply kun magpadayon ang El Ninio.
Magapatigayon man ang Hiraya sang water deliveries sa mga balay nga wala nagid nagakalab-utan sang water supply sa karun nga tag-ilinit.
May 33 gensets man nga ginhanda ang Hiraya bilang preparasyon batok sa brownout.
Nagpanugyan si Verdeflor sa mga konsumidor nga kun may makita nga leak sa mga water pipes sa mga dalanon ang ipahibalo dayun sa pamunuan sang Hiraya ukon BACIWA agud nga makay-o ini gilayon.
