Aminado ang general manager sang Bacolod City Water District (BACIWA) nga may yara sang kakulangan sa supply sang tubig nga ginasupply sang BACIWA kag Prime Water bangud ang injection point number 2 sang nagkontrata sa ila nga supplier ang wala nakahatag sang supply sang tubig santo sa nakasaad sa ginpirmahan nga kontrata.
Suno kay Mona Dia Jardin, nagapangayo ini sang paghangop sang mga konsumidor bangud ang injection point number 2 sang Bacolod Bulk Water Incorporated (BBWI) ang wala nakahatag sang supply nga natalana nga makasupply sa south nga bahin sang syudad.
Nagpasalig man ini nga wala nagapabaya ang BACIWA sa paghatag sang solusyon sa problema sang mga konsumidor kag ginatinguhaan sang mga ini nga masolusyunan ang problema sa supply sang tubig.
Suno kay Jardin, sa karun ginabanta nga sa sulod sang isa ka bulan, makapirmahanay na sila sang government to government contract kaupod ang Murcia Water District para sa 50 million liters nga supply sang tubig kada adlaw.
Suno sa general manager, 10-15 million liters ang kulang sa supply sang BACIWA kada adlaw gani ang 50 million liters nga pirmahan nila nga kontrata sa Murcia Water District ang may yara pa sang sobra nga magamit pa sa iban nga kinahanglanon sang BACIWA.
Nagpangayo man ini sang pasaylo sa malubog nga tubig nga nagatubod sa mga gripo bangud ini ang kabahin sang kakulang sang supply sang tubig.
Apang nagpasalig man ini nga kun may yara na sang nagakaigo nga supply magatin-aw naman ini.
Ang pagaagyan nga linya sang tubig halin sa Murcia Water District ang wala naman sang problema bangud may yara naman sang linya apang kinahanglan lang nga padakuan kag wala naman sang problema bangud nahamtang man ini sa higad sang dalan.
