BACOLOD CITY – Magapatigayon sang dayalogo ang mga opisyales sang Bacolod City Water District (BACIWA) sa mga lokal nga opisyales sang Bacolod kag konsumidores sa maabot nga Mayo 26, Byernes sa madason nga semana.
Suno kay BACIWA Board of Directors Chairman Atty. Lorendo “Endong” Dilag, las-2:00 sa hapon patigayunon ang dayalogo kun sa diin durante sang open forum, mahatagan sang kahigayunan ang mga konsumidores nga ipalayag ang ila mga problema kag reklamo sa serbisyo sang water district kag ang opisyales sang BACIWA ang nakahanda nga sabton ang mga ini.
Ini ang sabat sang water district sa panawagan ni Mayor Evelio “Bing” Leonardia nga ila iplastar ang matuod nga estado sang suplay sang tubig sa ciudad.
Ginpabutyag sini nga sa apat kabulan niya nga pagpungko bilang chairman sang BACIWA Board of Directors, ginatinguhaan gid sang hunta-direktiba nga mapangitaan sang solusyon ang kakulang sa tubig sa Bacolod.
Apang antes pa man ang dayalogo, ginpaathag na ni Dilag nga nagninit ang suplay sang tubig sang tinalikdan nga semana bangud sang asud-asod nga brownout kun sa diin naapektuhan man ang pag-andar sang 32 sa 60 nila ka mga deepwells.
Samtang, ginpabutyag ni Atty. Dilag nga sa bulan sang Hulyo, makasugod na sa pag-supply sang tubig ang injection point sa Barangay Granada, bilang kabahin sang bulk water supply sang BACIWA.
Ginalantaw naman ang pagpatigayon sang isa naman ka bidding para sa dugang pa nga supply sang tubig sa Bacolod.
