Nagpangayo sang pasensya ang general manager sang Bacolod City Water District bangud c nga bills sang mga konsumidor sa bulan sang Hunyo tuga sang computer error.
Suno kay Atty. Juliana Carbon, ang sala sa bills sang mga konsumidor ang tuga sa computer error kag mangin sila ang nakibot man kun ngaa nagluntad ang insidente.
Suno kay Carbon, sa bulan sang Marso, Abril kag Mayo, ila ginpatuman ang average billing tuga sang COVID-19 samtang sa bulan sang Hunyo, actual reading na kuntani apang may natabo nga deperensya.
Suno sa iya, ila ini ginatinguhaan nga macorrect gani ila kuhaon ang actual reading sang nasambit nga mga bulan kag ibuhin lang sa bill sa palaabuton nga mga binulan sugod sa Hulyo ang sobra nga kwarta.
Nagapasalamat man ang general manager nga nahatagan sila sang oportunidad nga maka-eksplekar kun ngaa may deperensya kag nag-abiso ini sa mga konsumidor nga kun may yara sang pamangkot, sarang lang nga makacontact sa ila paagi sa email ukon text bangud ginadumilian ang pagkadto sa ila opisina bilang paglikaw sa paglapta sa coronavirus.
Nagapasalamat naman si Councilor Wilson “Jun” Gamboa Jr., convenor sang Amlig Tubig, sa pagresponde ni Carbon sa resolution nga ginpagwa sang Sangguniang Panlungsod nga maghatag sila sang eksplenasyon sa hinali nga pagsaka sa bill sang mga konsumidor kag pagtambong man sa ila ginpatigayon nga public hearing.
Suno kay Gamboa, nangin positibo kag informative ang ila paghinun-anon sa ginpatigayon nga hearing.
