Ginkumpirmar sang isa sa mga convenor sang Amlig Tubig nga nagsabat na ang Bacolod City Water District (Baciwa) sa ginpadala nila nga sulat sa water district kun sa diin nalakip ang 20,000 ka mga signatures halin sa mga concerned consumers kag stakeholders agud indi pagdayunon ang joint venture sa Prime Water.
Sa interview sang Bombo Radyo Bacolod kay Fr. Cris Gonzales, isa sa mga convenor sang Amlig Tubig kag head sang Social Action Center sang Bacolod, ginpahayag sini nga suno sa Baciwa “under negotiation” pa man ang joint venture agreement sa tunga nila sang Prime Water.
Nagapati ang Amlig Tubig nga indi lang joint venture ang matabo kun madayon ang kontrata sa Prime Water kundi privatization.
Suno sa iya, madehado ang ciudad kun madayon ang JVA.
Dugang pa ni Gonzales, padayon sila nga magatutok sa mangin desisyon sang water district bangud wala gid sang maayo nga madulot ang joint venture.
Panindugan sini, dapat gobyerno ang magadumala sang isa ka water district bangud kun isa ka private company na ang maga-manage, buot silingon negosyo na ini kag indi na serbisyo.
