Gin-ako sang acting general manager sang Prime Water – Bacolod City Water District nga madamo nga areas sa ciudad ang nagaproblema sa kalidad kag supply sang tubig.
Nahibaluan nga madamo nga konsumidor ang nagareklamo sa Bombo Radyo nga maitom ang tubig nga nagagwa sa gripo ukon maninit gid ang supply.
Sa interview sang Bombo Radyo kay Michael Soliva, nagkaproblema ang bulk water supplier nga Bacolod Bulk Water Incorporated bangud naguba ang ila planta kag wala nakadeliver sang nagakaigo nga volume sang tubig.
Bangud sa sini nga problema suno kay Soliva, ginacompensate sang mga pasilidad ni BACIWA nga ginaoperate sang Prime Water ang kulang nga supply nga nagresulta sa pagkaguba sang pumping stations.
Bangud sini, nadulaan sang supply ang pila ka mga areas of operation kaangay sang Barangay Villamonte kag Handumanan.
Maitom naman ang tubig sa iban nga bahin sang ciudad bangud nadisturbo ang distribution pipes kadungan sang repair kag improvement sang Prime Water sa water lines kag valves.
Suno kay Soliva, natural lamang ini nga operational problems apang ginatinguhaan sang water utility nga makaayo ini gilayon.
