Nagpasalig ang Bacolod City Government nga may contingency plan na sila kag ang Bacolod City Water District – Prime Water sa naganubo nga water supply subong nga may tig-ilinit kag may-ara pa sang fuel crisis.
Sa interview sang Bombo Radyo Bacolod kay Bacolod City Administrator Atty Mark Steven Mayo, nagpatawag na kahapon sang meeting si Bacolod City Mayor Greg Gasataya sa water concessionaire, apang antes paman ginpangayo na sang alkalde ang status report sa status sang water supply sa ciudad.
Nahibaluan nga yara na lamang sa 90 tubtob 95 million liters per day (MLD) ang nagasulod nga water supply, nga kulang para sa konsumo sang 61 ka Barangay.
Sa karun, ginapangayo sang City Government ang listahan sang purok nga apektado sa kada barangay.
Nahibaluan nga may-ara sang water rationing nga ginapatuman ang BACIWA-Prime Water, samtang ang ciudad ang naga-offer man sa pagbulig.
Suno kay Mayo, ginalauman na ang pagnubo sang water level sa tion sang tig-ilinit.
Apang ang mandato ni Mayor Greg, nga maseguro nga indi madulaan sang water supply ang pumuluyo, kag indi man sini luyag nga may matabo pa nga water crisis, karun nga nagapangatubang na sang energy crisis.
Gin-athag man ni Mayo nga masobra 50 porsyento sang water supply sang BACIWA-Prime Water ang gikan sa bulk water, gani kun may ara sang logistical problems kaangay sang pagka-unan sang operasyon ukon maguba nga pasilidad, ini ang mabatyagan gid sang pumuluyo.
Nahibaluan nga gin-issuehan sang cease and desist order sang Environmental Management Bureau-Negros Island Region ang Bacolod Bulk Water Inc. bangod sa ginhimo nila nga expansion sang proyekto sa Sum-Ag river nga wala sang nagakaigo nga environmental permit.
