Dismayado ang probinsya sang Negros Occidental sa Bacolod City Water District (BACIWA) matapos wala nagpabatyag kun ini ang mangin kabahin sang Bulk Water Project sang probinsya.
Suno kay Negros Occidental Provincial Administrator Atty. Diaz, tubtob subong wala pa nakahatag sang ila “Letter of Intent” (LOI) ang BACIWA kun magapasakop ini sa nasambit nga proyekto.
Suno kay Diaz, importante man nga maga-presentar ang BACIWA sang request sang kadamuon sang tubig nga ila ginakinahanglan bangud importante ini sa ginahimo karon sang probinsya nga feasibility study.
Suno pa diri, dismayado ini sa pamunuan sang BACIWA bangud lain ang natabo karon kaysa ila ginpasalig sa probinsya sang nagtambong ang mga ini sa ginpatigayon nga water forum.
Suno kay Atty. Diaz nagpasalig ang BACIWA sadto nga magakuha sang atleast 40 minimal liquid discharge (MLD) nga suplay sang tubig gikan sa bulk water.
Apang gin-athag ni Atty. Diaz nga bisan kun indi magapasakop ang BACIWA, magapadayon sa gihapon ang nasambit nga proyekto bangud ini ang ginalantaw sang probinsya nga sabat sa kakulang sang tubig sa madason nga mga tinuig.
Suno pa kay Diaz santo sa ginpatigayon nga pagtuon sang United States Agency for International Development (USAID), tatlo ka tuig sumugod subong, posible nga may matabo nga krisis sang tubig sa siyudad sang Bacolod kag Negros Occidental.
Ginpahayag man ni Diaz nga kun wala gid sang interes ang BACIWA, mapilitan sila nga i-direkta na lamang sa iban nga Local Government Units nga naka-sumiter na sang letter of intent ang suplay sang tubig.
Sa karun, unahon sang probinsya ang confirmed nga magakuha sang bulk water supply nga gilakipan sang Silay kag Talisay City.
Ang bulk water project sang probinsya ang magakuha sang supply sang tubig sa mga suba sa probinsya sabaylo nga ground water.
