Paga-tsekyaron pa sang Punong Barangay sang Barangay Handumanan ang background sang maglive-in partner nga nakuhaan sang masobra P2 million nga balor sang suspected shabu sa Purok San Roque 1, Barangay Handumanan, Bacolod City.
Arestado sa buy bust operation sanday Maria Elirica Celis, 39-anyos kag Carlo Purillo, 36-anyos, lunsay mga residente sang nasambit nga lugar.
Sa interview sang Bombo Radyo kay Punong Barangay Ricardo Danoy, sadtong tion na lamang sini nahibaluan nga may buybust operation nga ginpatigayon kag dalagko pa ang balor sang nakuha nga illegal nga druga gikan sa mga subjects.
Suno diri, iya ginapakadto sa Barangay hall ang mga makilal-an sini nga may kaangtanan sa illegal nga druga, kun sa diin iya ang mga ini nga gina-atubang kag ginapaandaman.
Aminado man ang Punong Barangay nga magagmay lamang ang mga ginapalakat nga illegal nga druga sa ila lugar kag ang mga dalagko nga balor ang masami gikan sa gwa kag ginapasulod lamang sa barangay.
Sa karun, iga-tsekyar pa sini ang background sang duha ka suspetsado, bangod indi sini kilala ang mga nagkaladakpan.
Nakumpiskar sa duha ang suspected shabu nga ginabanta nagabug-at sang 300 grams kag may estimated market value nga P2,040,000.
Sa karun nakahunong na sanday Celis kag Purillo sa Bacolod Police Station 10 kag magapangatubang sang kaso nga paglapas sa R.A. 9165 ukon Comprehensive Dangerous Drugs Act of 2002.
