Patay ang operator sang backhoe matapos nga maipit sa nagbaliskad nga amphibious dredger samtang nagapatigayon sang dredging operation sa suba sa Barangay 1, Hinigaran, Negros Occidental, kahapon sang aga, Nobyembre 21.
Sa interview sang Bombo Radyo Bacolod kay Police Lt. Voltaire Sy, Deputy Chief of Police sang Hinigaran Municipal Police Station, ang biktima ang ginkilala kay Harvey Nepumoceno, 30-anyos, married kag residente sang Sitio Pahilanga, Barangay Miranda sang nasambit nga banwa.
Suno kay Sy, si Nepumoceno ang driver operator sang backhoe nga ginapanag-iyahan sang Local Government Unit sang Hinigaran nga nalubong sa suba nga ginahawanan matapos nga madamo sang na-stock nga kawayan nga resulta sang naglabay nga bagyo.
Suno diri, gintinguhaan pa sang driver nga mapatakas ang dredger matapos nga malubong ini sa lunang apang wala sini masarangan kun sa diin nagbaliskad ini kag siya ang naipit.
Gintinguhaan man sang apat ka mga pumuluyo sang Barangay 1 nga makuha ang dredge operator nga na-trap apang wala nila masarangan.
Ang nagresponde nga mga kapulisan ang nagtawag man sang dugang nga bulig sa iban nga government agencies.
Nagresponde ang katapo sang Disaster Risk Reduction Management Office sang Hinigaran, Philippine Coast Guard kag katapo sang Hinigaran Municipal Fire Station.
Natigayon man nga makuha ang natrap nga driver sang nagbaliskad nga dredger kag gindala sa Hinigaran Medical Clinic apang gindeklarar na nga dead on arrival.
