Ginbawian sang kabuhi ang isa ka backhoe operator matapos ginluthang sa Purok Santan, Barangay Abuanan, Bago City, Negros Occidental, pasado alas-3:00 kahapon, Abril 30.
Ang biktima ang ginkilala nga si Evaresto Joven, 58-anyos, isa ka backhoe operator, kag residente sang nasambit nga lugar.
Sa inisyal nga imbestigasyon, ang biktima ang nagapungko sa atubangan sang iya nga tyangge kaupod ang iya nga asawa sang nag-abot ang isa ka armado nga lalaki kag hinali lang gintiro si Evaresto sang makapila ka beses.
Santo sa report, ang suspek ang nagasuksok sang long-sleeves nga gray, skinny maong pants, kag blue-and-white nga tennis shoes.
Ang biktima ang nakaagom sang igo sa nagkalain-lain nga bahin sa iya lawas kag gilayon nga gindala sa ospital apang ginbawian gid ini sang kabuhi.
Nalagyo naman ang suspek sa wala mahibaluan nga direksyon kag ginapangita na sang mga kapulisan.
