Ginkompirmar sang provincial administrator sang Negros Occidental nga nasolusyunan na ang duha ka problema nga ginpangatubang sang Teresita Lopez Jalandoni Provincial Hospital (TLJPH) Molecular Laboratory nga nagresulta sa pagkadelay sang releasing sang RT-PCR test result.
Sa interview sang Bombo Radyo kay Atty. Rayfrando Diaz, naka-hire na sila sang mga encoders nga ginbutang sa Provincial Health Office (PHO) kag Negros Occidental Language & Information Technology Center (NOLITC) gani mas madasig na sa karun ang releasing sang resulta bangud encoded na ang profiles sang mga ginkuhaan sang swab samples.
Ginpahayag man sini nga may yara sang mga IT supervisors nga nagikan sa NOLITC agud magsupervise sa mga data encoders.
Ginkompirmar man ni Diaz nga amat-amat na badbad ang masobra dos mil ka mga swab results nga wala pa nakagwa.
Suno pa diri, may yara na sang masobra 200 ka mga swab test result nga negatibo nga narelease na kag ginpapauli man matapos ginpadal-an sang resulta ang mga alkalde sang tagsa ka Local Government Unit (LGU) sa probinsya kun sa diin nagapauli ang LSI ukon OFW.
Ginpahayag man ni Diaz nga nagapangita man si Governor Eugenio Jose “Bong” Lacson sang paagi agud makakita sang bag-o nga machine nga makabulig sa pagpadasig sang pagproseso sang mga swab test.
Samtang, ginapreparahan na sa karun sang probinsya ang pagpauli sang mga Locally Stranded Individuals (LSI) ilabi na ang mga nagasakay sa barko.
Ginpahayag man ni Diaz nga nakaschedule ang mga airlines nga makasulod kag makagwa sa probinsya.
