Patay ang backrider sang traysikol matapos nga maaksidente sa Purok Tangke, Barangay Pandanon, Murcia, Negros Occidental kahapon sang hapon.
Ginkilala ang napatay nga si Alias Gregorio kag residente sang Purok Santan, Barangay RSB, La Carlota City, Negros Occidental samtang pilason naman si Alias Edson, 30 anyos, laborer, single kag residente sang Zone 1, Barangay Singcang Airport, Bacolod City.
Ang driver sang traysikol ang ginkilala nga si Alias Renz, 28 anyos, single, kag residente sang Purok Santan, Barangay RSB, La Carlota, City, Negros Occidental.
Sa interview sang Bombo Radyo Bacolod kay Police Captain Honey Labaro, hepe sang Murcia Municipal Police Station, santo sa inisyal nga imbestigasyon ang traysikol ang nagabiyahe halin sa banwa sang Salvador Benedicto padulong sa banwa sang Murcia apang pag-abot sa lilikuon nga dalan, nadulaan sang control ang driver gani nahulog ang mga ini sa drainage.
Bangud sini ang driver kag duha ka pasahero ang nakaangkon sang pilas sa nagkalain lain nga bahin sang lawas.
Gilayon ang mga ini nga gindala sa Murcia Municipal Health Unit apang si Alyas Gregorio ang gindeklarar nga dead on arrival.
Ginahibalo pa sa karun kun mapasaka ang pamilya sang napatay sang kaso sa driver sang traysikol.
