Ginpanindugan sang mga kapulisan nga indi matuod nga nalapakan sang salakyan ang backrider sang motorsiklo nga napatay matapos ma-aksidente sa Bangga Phase 3, NHA Village Circumferential Road, Barangay Pahanocoy, Bacolod City sang tinalikdan nga inadlaw.
Sa interview sang Bombo Radyo Bacolod kay Police Major Elmer Bonilla, pinuno sang Traffic Enforcement Unit sang Bacolod City Police Office, may yara sang nagkomento nga indi self-inflicted ang natabo nga aksidente kag ang motorsiklo ang nalapakan sang salakyan.
Ini ang ginpanginwala ni Bonilla, kag sila ang may nakuha nga CCTV footage kun sa diin makita nga natumba ang motorsiklo.
Dugang pa sini nga nakita man sa footage nga gin-cross pa sang motorsiklo ang inner lane nga may nagapadulong nga SUV.
Nagbahar ang SUV kag didto nakita nga nagtakingking ang motorsiklo nga nangin rason sang pagslide kag pagkatumba sini.
Bangud sini ginalantaw nga nakalampos ang ulo sang backrider nga gintunaan sang iya kamatayon.
Suno kay Bonilla, ginpahayag sang traffic investigator nga santo sa paathag sang doctor nga nag-atinder sa biktima nga kun nalapakan ini sang salakyan dapat may yara ini sang fracture sa tul-an kag ulo apang mismo ang mga eksperto ang nagapahayag nga ang tul-an sang biktima ang intact.
Gani panindugan sini nga nagapabilin nga self-inflicted ukon wala sang kontra ang biktima sang ini ang naaksidente.
