Aminado ang nag-rank 10 sa 2017 Physician Licensure Examination nga wala sini ginhandum nga mangin doktor.
Sa exclusive interview sang Bombo Radyo kay Dr. Dominique Ariel Bingcang Tomampos nga taga-Barangay Taculing, ciudad sang Bacolod, ang luyag lamang sadto amo nga mangin isa ka basketball player bangud sang huyog sini nga paghampang sang basketball.
Apang gingiyahan ini sang iya lolo kag lola nga magkuha sang nursing kag madinalag-on man ini nakapasar sa board exams.
Suno kay Doc Nicnic, sang ulihi nakit-an sini nga indi na tuman kadaku sang demand para sa mga nurses sa iban nga pungsod rason nga nagdesisyon ini nga magsunod sa tapak sang iya iloy kag tiyo nga lunsay mga doktor.
Sa pihak nga nagsugod nga nabudlayan sa pagkuha sang kurso nga medisina sa Central Philippine University (CPU), natigayon nga malampuwasan ni Tomampos ang kabudlayan sa pagtuon.
Apang kaangay sang iban nga estudyante, nag-abot man si Doc Nicnic sa punto nga nabuyo ini sa paghampang sang computer games apang suno sa iya, nagpanikasog ini nga makatapos bangud luyag sini nga mangin isa ka maayo nga doktor.
Nakahibi naman ini sang tuman nga kalipay matapos nga nalakip sa Top 10.
Suno kay Dr. Tomampos, nangin emosyonal ini sang mahibaluan nga nangin rank 10 ini sa 831 nga nakapasar gikan sa 1,317 nga nagkuha sang nasambit nga pasinawan.
Suno sa iya, halos indi ini makapati sa kadalag-an nga nag-abot sa iya kabuhi tubtob nga siya na mismo ang nakakita sang iya ngalan sa listahan sang mga nalakip sa Top 10 kun sa diin nakakuha ini sang 85.92 percent average.
Suno kay Doc Nicnic, gilayon sini gintawgan ang iya pamilya nga una pa gali nga nakahibalo nga nakapasar ini sa board exams.
Suno sini gintawgan ang iya iloy nga doktor sa Papua New Guinea kag nakasinggit man ini sang tuman nga kalipay.
Karon nga isa na ini ka doktor, luyag sini nga mag-untat na sa pagtrabaho sa luwas kag magpauli na ang iya nga iloy sa Pilipinas.
Tuman naman sini nga ginapasalamatan ang iya pamilya nga bug-os ang ginhatag sa iya nga suporta kag ang ila simbahan nga nagpangamuyo para sa pagpasar sini sa board exams.
