Aminado man ang presidente sang Bacolod Alliance for Commuters Operators and Drivers (Bacod) Inc. nga indi man maparalisa ang transport sector kun magauntat biyahe ang mga traditional jeepneys apang nagapati ini nga may yara sang epekto.
Sa interview sang Bombo Radyo Bacolod kay Rudy Catedral, husto man ang pahayag sang Department of Transportation nga indi man maparalisa ang transport sector sa patigayunon nga untat-biyahe apang dako man ang mangin epekto sini sa mga commuters.
Suno diri, lantawon gid nila kun masarangan gid sang modernized jeepney ang pagcater sang mga pasahero bangud nahibaluan naman sang tanan nga tama ka kulang ang nasambit nga units nga nagabiyahe sa Bacolod City.
Wala man ini nagapati nga tubtob lang sa Abril 30 ang consolidation sang traditional jeepney bilang requirement sa jeepney modernization program bangud nakita sang mga ini nga indi handa ang gobyerno sa pagpatuman sang nasambit nga programa.
Ginpahayag man ni Catedral nga wala siya nagapati nga ang nasambit nga programa ang indi masaktan sang politika bangud nakita na sini nga may mga kongresista na nga nagapabor sa indi pagphase out sang traditional jeep.
