Liwat nga magapatigayon ang rally protesta ang pila ka mga traditional jeepney owners kag operators sa ciudad sang Bacolod agud nga ipakita sa gobyerno nga indi ang mga ini pabor sa jeepney modernization program.
Sa interview sang Bombo Radyo Bacolod kay Rudy Catedral, chairman sang Bacolod Alliance For Commuters Operators & Driver’s Incorporated (BACOD Inc), magapatigayon sila sang protesta alas 2:00 ang takna karun sa hapon halin sa bangga Awing, magabalay sa Rizal Araneta, libot sa plaza kag magapatigayon sang programa sa fountain of justice ukon sa old city hall agud nga ipakita nga indi sila luyag traditional jeepney phase out kasubong man consolidation para sa jeepney modernization program.
Suno kay Catedral, indi sila luyag nga magpaidalom sa consolidation bangud ini ang magadula sang ila nga palangabuhian.
Ginabanta nga magadangat sa 1000 tubtob 2000 ka mga individual ang ginalantaw nga magaupod sa rally protesta.
Nagpangayo man ini sang pasaylo sa mga commuters nga wala na sila sang masakyan nga traditional jeepneys sa madason nga tuig.
Ginaagda man sini ang mga commuters kun mahimo makaupod ang mga ini sa ila nga patigayunon nga rally protesta subong nga adlaw.
