Nagpasalig sang peaceful nga rally kag trasnport strike ang presidente sang Bacolod Alliance for Commuters, Operators and Drivers Incorporated (BACOD) sa Lunes kag Martes.
Sa interview sang Bombo Radyo Bacolod kay BACOD President Rudy Catedral, wala na sang singgitan nga matabo kag sila ang magatipon-tipon kag magakaon-kaon lamang.
Suno diri, ang ila peaceful rally ang para mapakita kun diin ang husto sa tunga sang traditional jeepneys nga wala sang rehistro nga nagapakigbato sang husto ukon ang mga kapitalista nga nagaduso sang Public Utility Vehicle Modernization Program kag nagagamit sang police power para sa ila personal nga interes.
Nagpanawagan man si Catedral sa mga kapulisan nga indi mangin bias bangod nga ang nagaka-apektohan amo ang mga drivers, operators kag commuters.
Gin-athag man sini nga ang ila rally sa Lunes kag Martes ang bangod nga ang masobra 1,000 ka modernized jeepney sa ciudad ang wala sang rehistro kag wala sang prangkisa kag insurance.
Pahayag ni Catedral, dapat nga hatagan sang win-win solusyon ang problema sa Public Utility Vehicle Modernization Program.
