Ginkumpirmar sa pinuno sa Bacolod City Disaster Risk Reduction and Management Office (CDRRMO) nga ipaagi nila sa Philippine Red Cross ang paghatag sang relief assistance sa mga pamilya nga gin-evacuate bangod sa bagyo Agaton, bangod indi derekta makahatag assistance ang Bacolod City Government bangod sa Banning sa public funds dala sang Election Period.
Suno kay Executive Assistant to the Mayor Joemarie Vargas, sa ila nga record, may 29 na ka pamilya ang gin-evacuate sa Barangay Alijis kag gindala sa isa ka buluthuan.
Apang bangod sa Election period kag indi ang mga ini makapagwa sang pondo nga derekta mahatag sa mga pumuluyo, ipaagi nila ini sa Philippine Red Cross nga gin-authorize sang Commission on Election (Comelec).
Paathag sini nga gikan sa Department of Social Services and Development (DSSD) ang relief assistance kaangay sang food packs kag hygiene kits ang ipadala sa PRC agud nga sila na ang magapanagtag sa apektado nga mga pamilya.
Sa ulihi nga impormasyon sini, wala na sang iban pa nga evacuees sa iban nga barangay bangod manubo lang ang tubig-baha.
May nakahanda naman nga Pick Up Truck ang CDRRMO nga magamit inkaso kinahanglan ang evacuation sa isa ka lugar kag may na-identify naman nga eskwelahan nga pagahamtangan sang mga evacuees.
