Nagapreparar na ang Bacolod City Disaster Risk Reduction and Management Office sa mga Barangay nga mahimo mahalitan inkaso may matabo nga major eruption sa Bulkan Kanlaon.
Sa interview sang Bombo Radyo Bacolod kay Bacolod CDRRMO Head Dr. Ma. Laarni Pornan, may pila ka mga Barangay sa Southern kag Northern part sang Bacolod City.
Madumduman nga una na nga nagpagwa ang CDRRMO sang data kalakip ang kadamuon sang mga vulnerable sector nga mahimo mahalitan sa idalom sang ila Oplan Listo.
Ini ang nagdangat sa 306,000 nga ginabug-usan sang mga kabataan, senior citizen, nagabusong kag mga may respiratory problems kaangay sang asthma ukon lung problems.
Apang paathag ni Pornan nga wala nagakahulugan nga tanan sa mga ini ang maapektuhan, bangod magadepende man sa huyop sang hangin ang igo sang ashfall.
Nagapanguna sa narecord nga may pinakamadamo nga vulnerable sector ang Barangay Estefania nga nagdangat sa 42,351, apang ini ang subject pa sa validation.
Ginasundan sang Barangay Mansilingan nga 27,526; Barangay Taculing nga 26,486; Barangay Handumanan nga 25,921; kag Barangay Villamonte nga 18,297.
Bilang preparasyon, ginahanda naman ang DRRM evacuation centers sa Barangay Taculing kag Barangay Vista Alegre nga magaserbe nga Regional Evacuation Centers para sa mga apektado nga local government units.
Ini ang magaserbe man nga emergency operation center agud mas mangin mahapos ang monitoring sa mga apektado nga LGUs.
Sa karun, ang ciudad ang nakapatigayon na sang prepositioning of goods, food and non-food items nga mahimo mabulig inkaso ipasaka sa Alert Level 4 ang status sang bulkan.
Paathag ni Pornan nga amo ang mga nangin commitment sang Bacolod City sa Office of Civil Defense inkaso matabo ang worst case scenario.
