Gin-athag ni Executive Assistant to the Mayor Ernie Pineda nga ginapahanumdum lang sang Department of the Interior and Local Government ang mga local government units nga padayunon ang road clearing operation nga una na nga naumpisahan apang nauntat bangud sa coronavirus pandemic.
Madumduman nga nagpagwa sang Memorandum Circular No. 2020-145 DILG nga nagamando sa mga gobernador, alkalde, punong barangay kag pinuno sang Sangguniang Panlungsod nga padayunon ang road clearing operation sugod Nobyembre 16, 2020 tubtob Enero 15, 2021.
Sa interview sang Bombo Radyo Bacolod kay Pineda, ginpahayag sini nga nasuguran na ini sadto sa pagpatuman apang wala lang nafollow-up bangud sa nagluntad nga coronavirus pandemic.
Suno kay Pineda, may yara gid sang iban nga mga vendors nga nagahingalit baligya sa mga sidewalk kun wala sang may nagabantay.
Gindugang pa sini nga indi gid makatutok ang City Legal Officers sa pagbantay bangud nagdamo ang ila nga ulubrahon bangud nga sila man ang nagapatuman sang health protocols.
Ginkumpirmar man ni Pineda nga padayon ang ila pag-release sang P5,000 nga cash assistance sa mga apektado sang road clearing operations sa ciudad sang Bacolod.
Suno sa iya, kinahanglan nga magpasa lang sila sang kumpleto nga mga dokumento agud nga makakuha sang ayuda.
