Makig-angot ang Sangguniang Panlungsod sa Women and Children Protection Desk (WCPD) kag sa Department of Education angot sa gina-alegar nga pagmolestiya sang isa ka maestro sa ciudad sang Bacolod sa tatlo ka mga dalagita.
Sa interview sang Bombo Radyo Bacolod kay Councilor Celia Flor, chairman sang Committee on Women, Family and Child Care, ang alegasyon ang isa sa ginalantaw nga kaso sang pagpang-abuso sa mga kabataan sang isa ka mentor sang mga kabataan kag dako ang penalidad sini kun matuod ang alegasyon batok diri.
Suno kay Flor, dapat ang alegasyon ang imbestigaran sang Department of Education bangud ang nasambit nga hitabo ang indi dapat pagtolerahon sang mga otoridad sang eskwelahan nga nagakabutang sa delikado ang mga kabataan.
Dugang pa sini nga dapat ang mga media entities ang proteksyunan man ang mga imbulbado sa nasambit nga insidente paagi sa mahinalungon nga pagbalita angot diri.
Kasubong man nga nagpanawagan man ini sa mga ginikanan nga protektahan ang mga kabataan.
Una na nga ginapaidalom pa sa psychological evaluation ang tatlo ka dalagita sa isa ka High School sa ciudad sang Bacolod kasunod sang reklamo nga sila ang ginmolestiyahan sang isa ka manunudlo.
