May yara na sang resolusyon nga ginpasar ang Sangguniang Panlungsod sa ciudad sang Bacolod kag natalana nga ipadala sa national offices sang gobyerno agud nga mareview ang ginapatuman nga jeepneys modernization program.
Sa interview sang Bombo Radyo Bacolod kay Councilor Renecito Novero, may yara sang petition ang mga nagapamatok sa PUV modernization program nga kinahanglan nga reviewhon sang Land Transportation Franchising and Regulatory Board (LTFRB) ang nasambit nga department order antes pa man ini ipatuman bangud madamo sang maapektuhan nga palangabuhian.
Suno kay Novero, ang nasambit nga petition sang mga drivers kag operators sang traditional jeepney ang nahimuan na sang resolution kag napasar na sa Sangguniang Panlungsod sa ciudad sang Bacolod kag ipadala na with dispatch sa national office sang Department of Transportation kag LTFRB.
Gin-athag man ni Novero nga ang Land Transportation Office ang implementing agency lamang sang DOTr kag nagatuman lamang sang ginamando sa ila kag wala man sang kahilabtanan sa PUV modernization program.
Suno diri, kun indi ang nasambit nga ahensya magpatuman sang ginamando sa mga ini sila man ang maigo kag makasuhan administratibo ukon kriminal.
Suno kay Novero, nagaempathize ang mga ini sa sitwasyon sa mga apektado nga mga drivers kag operators apang wala man ang mga ini sang mahimo bangud ang nasambit nga programa ang ginapatuman sang national government.
Suno diri apisar nga department order lamang ang PUV modernization program, daw kaangay man ini sang layi nga dapat ipatuman.
Gani, ginaabisuhan sini ang mga nagpadala sang petition nga hingyuon ang mga government agencies nga ginpadal-an sang resolusyon nga padasigon ang pagpadala sang ila nga mga sabat.
