Nagpasar sang resolusyon ang Sangguniang Panlungsod sang Bacolod nga nagahingyo sa National Government nga mahatagan sang ayuda ang mga mangunguma kag mangingisda nga apektado sang tuman nga pagsaka sa presyo sang gatong.
Sa interview kay Bacolod City Councilor Atty Caesar Distrito, author sang resolusyon, luwas sa mga drivers nga naga-antos sa tuman nga pagsaka sa presyo sang gatong, ini ang may dako man nga kahalitan sa mga farmers kag fisherfolks.
Suno diri, kun ang regular nga empleyado ang mag-untat sa pagtrabaho, ang maapektuhan lamang amo ang kaugalingon sini kag ang iya nga pamilya.
Apang pahanumdom ni Distrito nga ang mga mangingisda ang nagagamit sang gatong sa ila mga sakayan, kag ang mga mangunguma ang nagagamit man sang gatong sa mga farm machineries.
Dugang pa diri nga nagasaka man ang presyo sang farm inputs sa pagsaka sang presyo sang gatong bangod sa nagadako nga transportation costs.
Ginakahangawa sini ang tion nga mapilitan nga mag-untat ang mga mangingisda kag mangunguma bangod indi na masarangan ang presyo sang gatong.
Suno kay Distrito, ini ang indi lamang makatuga sang problema sa ila nga pamilya, kundi mahimo nga makatuga sang food crisis.
Gani panawagan nila sa National Government nga mahatagan man sang nagakaigo nga bulig ang mga farmers kag fisherfolks nga apektado sang oil crisis.
