Ginapamatian kag suportahan sang Bacolod City Council ang lihok sang mga kooperatiba kag korporasyon sang Modernized Jeepney, batok sa Senate Resolution nga nagapanawagan sa pagsuspender sang Public Utility Vehicle Modernization Program.
Sa interview sang Bombo Radyo Bacolod kay Councilor Al Victor Espino, chairperson sa Committee on Transportation sang Sangguniang Panlungsod, gin-athag sini nga sa PUV Modernization Program may ara sang nagasuporta kag may-ara man sang nagapamatok.
Nakita sa record sang Land Transportation Franchising and Regulatory Board (LTFRB) nga 86 porsyento na ang mga traditional jeepneys nga nagpaconsolidate samtang yara naman sa 72 tubtob 75 porsyento ang sa Bacolod City.
Ini nagapakita nga mas dako ang porsyento sang mga pabor sa PUV Modernization Program sang gobyerno.
Sa pihak sini, ang Sangguniang Panlungsod ang nagpamati sa mga nagapamatok nga grupo sang traditional jeepney kag sila ang naghimo sang resolusyon nga naghatag gahom kay Vice Mayor El Cid Familiaran, nga madula sa Senado kag Kamara ang position letter sang mga ini.
Ang tikang ang nangin giya man agud pamatian ang ila mga panawagan.
Karun nga ang mga nagsulod sa consolidation naman ang may panawagan, pasalig ni Espino nga sila ang yara man agud mamati kag magsuporta.
Dugang pa sini nga siya ang personal nga nagapati nga ang PUV Modernization Program ang sarang nga makapabaskog sang public transportation sa Pilipinas.
Pahanumdom ni Espino nga kun isuspender ang programa dapat pinsaron man sang gobyerno kun ano ang dangatan sang mayorya nga 82 porsyento nga nagsulod sa consolidation, ilabi na nga ang mga ini ang nakautang na kag may ginabayaran nga Modernized Jeepney units.
