Nagalaom ang Chairperson sang Committee on Education sa Bacolod City Council nga ang masunod nga tiglikom sang Department of Education (DepEd) ang may background sa sektor sang edukasyon kag indi na magakinahanglan sang malawig nga adjustment period sa pwesto.
Sa interview sang Bombo Radyo Bacolod kay Councilor Al Victor Espino, wala sang iban nga rason sa pagresign ni Vice President Sara Duterte bilang Education Secretary kundi bangod sa politika.
Ginapasalamatan man sang mga manunudlo ang ginhatag nga isa ka bulan nga pahuway kag pagbalik sang school calendar agud ma-enjoy man sang mga estudyante ang summer break.
Suno diri, nahimo man nga maka-adoptar sang DepEd sa pagbag-o sang klima sa pagpamuno sang bise presidente.
Apang bilang locally elected official, mas luyag sini nga ang masunod nga DepEd Secretary ang nakahangop gid sa sektor sang edukasyon.
Panindugan ni Espino nga kun nakapractice sa pagtudlo ang DepEd Secretary, mahangpan sini kun ano ang kinahanglan buhaton.
Suno diri, si Duterte ang wala sang background sa edukasyon kag ini ang nagkinahanglan pa sang malawig nga adjustment period.
Pahayag sang konsehal nga ang oras nga nauyang ang makonsiderar man nga production loss.
Sa pihak sang mga issue, pasalig naman ni Espino nga ginatinguhaan sang Bacolod City nga ma-address ang mga problema kaangay lamang sa pagtinguha ni Bacolod City Mayor Alfredo ‘Albee’ Benitez nga mapasaka ang budget sa ‘special education fund’.
