Ginkumpirmar sa Bombo Radyo ni Bacolod City Councilor Al Victor Espino nga wala na ini sa Grupo Progreso.
Suno sa konsehal, ginhambalan ini sang chairman sang grupo nga si Bacolod City Mayor Evelio “Bing” Leonardia sa meeting nga ginpatigayon nga wala na ini sang pagsalig sa iya.
Suno kay Espino, wala naman nadula ang pagrespeto sini sa alkalde kundi mas nagdalom pa gid ang pagtahod sini kay Leonardia bilang lider kag political ally.
Ini bangod personal mismo nga ginhambal sini sa iya atubang nga wala na ini sang salig sa iya ilabi na nga malapit ini kay anay 3rd District Congressman Albee Benitez.
Ini man ang rason kun ngaa nagwa nalang ini sa nasambit nga meeting.
Ginpahayag man sang alkalde sa iya nga kun indi lang si Benitez ang kasumpong sini sa politika, magapabilin man kuntani ang pagsalig sini sa iya.
Suno kay Espino, malapit ini kay anay 3rd District Congressman Albee Benitez kag ginakabig niya ini nga personal nga abyan kag mentor.
Sa karon, wala pa sang plano para sa 2022 Elections si Espino.
Suno diri, magapadalagan lang ini kun may ara sang mabaskog nga makapabugtaw sa passion sini sa pagserbe sa mga pumuluyo.
Nahibaluan nga si Benitez ang nagdeklarar nga magapapili ini sa pagkaalkalde sa ciudad sang Bacolod.
Suno kay Espino, magasuporta naman ini sa karun kay Benitez.
Ginakalipay naman sang konsehal nga nangin kabahin ini sa ordinansa sa pag-establish sang pinakauna nga ospital sang Bacolod.
Dugang pa sini nga nakapangita sila sang kwarta sa balor nga P41 million para sa proyekto apisar pa nga may COVID-19 pandemic.
Ini ang gikan naman sa mga penalties kag surcharges sang real property taxes sang syudad.
