Ginakalipay ni Bacolod City Councilor Atty Dindo Ramos nga siya ang ginbutang nga chairperson sa Committee on Urban Poor, Housing and Resettlement kag Committee on Transportation and Traffic sa Sangguniang Panlungsod.
Sa interview sang Bombo Radyo Bacolod sa konsehal, malipayon ini sa nabatun nga duha ka chairmanship bangod siya ang nangin chairperson naman sadto sa nasambitan nga mga komitiba.
Suno kay Ramos, naka-establisyar na siya sang relasyon sadto sa Urban Poor Association kag Housing Association.
Kabahin sini, tsekyaron niya ang mga pagpatigayon sang demolition, agud maseguro nga nahatagan sang tion ang mga apektado nga pumuluyo nga makapreparar.
Samtang tsekyaron man sini ang sitwasyon sa trapiko kag seguruhon nga makadihon sang mga legislation nga makahatag sang kahusayan sa dalanon.
Kalakip diri ang nahanungod sa traffic lights kag iban pa nga mga mahimo makasolbar sa traffic congestion.
Lantawon man sini ang needs kag concerns sang mga drivers kag operators nga apektado sang public utility vehicle modernization program (PUVMP).
Kasubong man ang nagaduging nga mga colorum nga tricycle.
Ini bangod ang pagduging sang colorum nga tricycle ang makapatay sang palangabuhian sang mga miyembro sang Tricycle Operators and Drivers Association (TODA) nga may nagakaigo nga rehistro kag permits gikan sa ciudad.
Aminado si Ramos nga luyag man sini kuntani pamunuan ang Committee on Markets, apang ang komitiba ang ginpabilin kay Councilor Celia Flor.
