Makaligad ang pila ka adlaw, nagpagwa na sang statement si Bacolod Councilor Israel “Ising” Salanga nahanungod sa pagkaulamid sang iya ngalan sa nakabunggo nga Mitsubishi Strada kun sa diin nabuka ang glass wall sang Quan Delicacies sang tinalikdan nga Sabado, Nobyembre 25 sa BS Aquino Drive sa ciudad sang Bacolod.
Ginpahayag ni Salanga nga aga pa ini nagahimos bangud may klase kada Sabado sang aga sa STI-West Negros University apang samtang nagahimos nakadanlog ini sa banyo.
Suno sa post ni Salanga, nakalampos ang bilog sini nga lawas kag iya gintukod ang iya kamot agud proteksyunan ang ulo sini apang bangud natukod niya ang kamot, nakabatyag ini nga daw nabali ini.
Nagilis ini gilayon kag gintawgan ang isa sa staff sini nga residente sang Barangay Villamonte nga malapit sa iya ginatiniran agud nga magdrive kag madul-ong siya sa Doctor’s Hospital.
Ginbilin man ni Andres Enrico Realubit, 20 anyos ang konsehal sa nasambit nga ospital agud maghingagaw sa pagpangita sang maparkingan.
Didto nakita ni Realubit ang space sa atubang Quan delicacies kag samtang nagapark ini, gulpi nga nagbutchog ang salakyan kag naglapaw pasulod sa glass wall sang nasambit kalan-an.
Naghingagaw man nga nagpanaog si Realubit agud nga mapahibalo sa kosehal ang natabo kun sa diin nagahulat na si Councilor Salanga nga ipaidalom sa x-ray ang iya na injured nga kamot.
Suno pa sa social media post ni Salanga indi matuod ang mga ginahambal sa iban nga mga balita nga ara siya sa sulod sang salakyan sang natabo ang insidente kag naghingagaw lang sulod sa ospital.
Ginpanginwala man ni Councilor Ising ang mga alegasyon nga siya ang tag-iya sang salakyan nga dala ni Realubit bangud ini ang ginapanag-iyahan sang iya utod nga si Mark Salanga bangud ini ang nakarehistro sa Official Receipt sang pick-up.
Ginpakita man sang konsehal ang mga litrato sang iya X-ray result, kalakip na ang CCTV footage nakuha sa Quan delicacies.
