Dako ang kalipay ni Bacolod City Councilor Jason Villarosa, chairperson sa Committee on Tourism sa Sangguniang Panlungsod sa madinalag-on nga Masskara Festival 2026.
Sa interview sang Bombo Radyo Bacolod sa konsehal, halin Day-1 tubtob Day-18, bisan ang mga festival goers ang makahambal nga nangin successful ang selebrasyon apisar sa indi mapaktan nga tiyempo.
Suno diri, ginbugayan gid sang Ginoo ang selebrasyon bangod apisar sa hangkat sang Super El Niño, may-ara gihapon sang mga pag-ulan, kag ini ang indi man tuman ka baskog nga makaapekto na sa mga aktibidad indi kaangay sang mga nakaligad nga Masskara celebration.
Pahayag ni Villarosa nga ang Bacolod Gugma Foundation na ang naggastos sa kadam-an nga aktibidad, kag ang ciudad ang naghatag na lamang sang manpower, logistics kag subsidies para sa mga Barangay kag eskwelahan nga nagpartisipar sa Electric Masskara kag Street Dance and Arena Competition.
Pahanumdom sini sa mga nakabatun nga kinahanglan gid sang liquidation sang ila gastos.
Aminado man ini nga gin-estriktuhan sang Gugma foundation ang makapasakop agud maseguro nga kalidad lamang ang makaperform.
Suno diri, bangod sa tuman ka damo nga mga partisipante sa nakaligad nga kompetisyon, ang kalidad ang indi mabantayan gani may makaperform nga kaangay nga kulang gid sa preparasyon kag indi pang-international level.
Gani malipayon ini nga sa subong nga tuig, lunsay kalidad gid ang napakita nga performance sang mga Masskara dancers.
Pangayuon man nila ang Masskara report agud makit-an kun sa diin may mga lapses kag kun ini ang sa bahin sang Barangay ukon sa ciudad.
Samtang first time man nga may gin-imbetar nga international artists, kun sa diin nagperform si British-Virgin Island singer-songwriter Iyaz.
Nagalaom ini nga sa masunod nga tuig mas ma-imprubar pagid ang Masskara Festival celebration.
Ginpasalamatan man sini ang bilog nga team sang Bacolod Gugma Foundation, kag ang tanan nga nagpartisipar kag nangin kabahin sang Bacolod Masskara Festival 2026.
