Nagapati si Councilor Renecito Novero nga mangin advantageous redistricting sang Bacolod City sa duha ka legislative district.
Sang Miyerkules, napasar unanimously sang Sangguniang Panlungsod ang resolution nga nagaduso sa approvlal sang redistricting sa ciudad.
Ini ang ginaduso bangud sa nagasaka nga numero sang populasyon sa ciudad kun sa diin santo sa census sang 2015, yara sa 561,875 ang populasyon sang mga Bacolodnon kag masobra duha ka pilo na sa 250,000 population sang isa ka ciudad.
Sa interview sang Bombo Radyo kay Novero, ginpahayag sini nga kun duha ang distrito sa ciudad, mas mapadasig pa gid ang mga development projects.
Suno sa iya, mangin duha ang lone district kag kun madayon, makaangkon sang tag-walo ka mga konsehal ang kada distrito.
Mangin madasig man ang development sang delivery projects sang ciudad.
Suno diri, ini ang liwat nga ginduso bangud sang nagliligad nga tuig wala ini natigayon bangud wala nakaintindi ang Kongreso.
Kun maaprubahan ang hagna, mangin kabahin sang first legislative district ang Barangays 1 tubtob 31, 33, 41, Alangilan, Banago, Bata, Estefania, Granada, Mandalagan, Monte Vista, Villamonte kag Vista Alegre.
Samtang malakip naman sa second legislative district ang Barangays 32, 34 tubtob 40, Alijis, Cabug, Felisa, Handumanan, Mansilingan, Pahanocoy, Punta Taytay, Singcang, Sum-ag. Taculing kag Tangub.
Kun matigayon ang redistricting sang Bacolod, isa sa gihapon ang mangin alkalde kag bise-alkalde samtang duha naman ang mangin kongresista kag 16 ang iga-elect nga konsehal kun sa diin tag walo sa kada distrito, nga magatake-effect sa masunod nga national elections.
