Kadungan sang pagbunok sang madamol nga ulan, nagtipon man ang madamo nga basura sa Mambulok Creek.
Madumduman nga ginlimpyuhan na sang Bacolod City Disaster Risk Reduction and Management Ofice kag sang Department of Public Works and Highways ang Mambulok Creek sang tinalikdan nga binulan agud nga mapatigayon ang clearing sa pangpang sini kag makailig sang maayo ang tubig.
Apang kadungan sang madamol nga ulan kagab-i bangud sa Bagyo Dodong, nagtipon man ang nagkalain-lain nga sahi sang basura ilabi na ang plastic.
Sa interview sang Bombo Radyo sa pila ka residente sa Purok Lampirong, ila ginpanindugan nga indi lang sila ang nagahaboy sang basura sa creek kundi ang yara man sa Barangay 8 kag Barangay 10.
Suno kay CDRRMO head Dr. Anna Maria Laarni Pornan, light to moderate rains ang nagatupa sa Bacolod bangud sa Hanging Hagabat kag wala pa sang evacuation.
Suno sa iya, 24/7 ang ila monitoring sa palibot sang ciudad bangud mahimo nga madamol ang ulan sa bukid kag nakastandby man ang mga barangay officials kun kinahanglan ang evacuation.
Ginamonitor man ang sitwasyon sa Mambulok Creek bangud wala pa natapos ang dredging diri.
Ang Bagyo Dodong ang nagaapekto sa Luzon apang ginaforecast nga magagwa man ini gilayon sa weekend.
