Nagpanindugan sang pinuno sa Bacolod City Drug Enforcement Unit nga lahetimo ang ila nga operasyon sa pihak sang mga alegasyon sang live-in partner sang ila nga gindakop sa drug buybust operation sa Purok Ylac, Barangay 1, Bacolod City sang Hulyo 5.
Una nga nagdangop si Alias Marie, live in partner ni Ronan Jay Garcia alias “Ar-Ar”, 28 anyos, nga nakuhaan sang 75 grams sang shabu nga nagabalor P510,000 sa Bombo Radyo Bacolod dala ang video kag graphic evidence sa ginaalegar indi husto nga operasyon sang Bacolod City Drug Enforcement Unit.
Pahayag sini nga una nagpadulong ang mga operatiba sa balay sang una nga partner ni Garcia sa Barangay 1 pasado alas-12:00 sang kaagahon kag gindala ang iya 4 anyos nga bata nga babayi agud tultulon ang ila balay sa Purok Cereza, Barangay 3 kapin alas-2:00 sang kaagahon.
Ginguba sang operatiba ang ila piyertahan, gintayaan sang armas kag gindamhagan si Garcia kag ang mga ini ang nagpahayag ‘diin ang kwarta! Diin ang kwarta!’ kag ginpang-ukay na ang ila pagkabutang.
Ginkastigo man kag gintaser ang subject person antes ginsakay sa van upod ang 4 anyos nga bata.
Pahayag ni Marie nga ginlibot-libot pa ang mga ini antes ginbalik sa balay sa Barangay 1, bangod santo sa reported nga oras sang buybust ang ginpatigayon alas-4:25 sang kaagahon.
Ginakastigo man kag ginataser ang subject sa sulod sang van sa atubang sang iya bata.
May CCTV footage si Marie sang pagkuha kay Garcia sa Barangay 3 kag may mga litrato sang mga lagob sang subject person.
CCTV Footage: courtesy of Alyas Marie
Lain naman ang shorts sang subject sang ginkuha sa Barangay 3 kag ginpatigayon ang buybust bangod gin-ilisan sang may bulsa.
Magluwas diri ginpahayag man sang 4 anyos nga bata nga gintaban sang operatiba ang aritos kag cellphone sang iya iloy kag cellphone sang magulang sini nga lalaki.
Sa interview sang Bombo Radyo Bacolod kay Police Captain Joven Mogato, may kinamatarong nga magfile sang complaint si Alyas Marie sa nagakaigo nga korte.
Apang pasalig sini nga lehitimo ang ila operasyon, sila ang may body cam kag may ara man sang media kag barangay officials nga witness.
Dugang pa sini nga wala man nila nakita si Alyas Marie kag ginalantaw nga ang reklamo ang agud lamang maguba ang kridibilidad sang drug buybust operations.
Suno kay Mogato, isa ka bulan sang nabatun nila ang impormasyon sang illegal activities ni Garcia gikan sa residente man sa lugar kag duha ka semana ang ila monitoring kag validation.
Si Garcia ang illegal nga nagabaligya sang gasolina kag diesel sa higad sang dalan bilang front, apang ini ang may runner man nga ginapadeliver sang mga illegal nga droga.
