Nangin emosyonal ang pinuno sang Department of Social Services and Development (DSSD) sang Bacolod nga si Pacita Tero sa special session nga ginpatigayon sang Sangguniang Panlungsod kahapon matapos gin-istoryahan ang ayudad sang city government sa mga pumuluyo.
Una diri, ginpatpat ni Councilor Wilson “Jun” Gamboa ang mga isyu ilabi na sang tinalikdan nga pagtililipon sang mga pumuluyo sa Bacolod City Government Center sa paglaom nga makakuha sang ayuda.
Ginpakigbahin ni Tero nga mas importante diri ang makabulig sa mga pumuluyo.
Ginpahayag man sini nga handa ini nga sabton ang responsibilidad kag batunon ang basol kun indi nangin madinalag-on ang programa.
Samtang ginpanindugan man sini nga may duha ka bahin sa natabo nga insidente sa BGC kag indi naman sini sarang nga matolerar ang mga kutso-kutso.
Apisar sina, ginapakamaayo nalang sini nga nakabulig sa mga pumuluyo.
Ginpahayag man ni Tero nga pagatun-an sini ang nangin sala kag batunon ang mga suhestyon sa masunod nga tinion agud nga mahimu ang mas labing maayo.
Paathag sini nga kun gustuhon sang mga ini nga mag lie-low sa ulobrahon sa DSSD sarang gid nila nga mahimu kag magrason nalang nga wala nasarangan, apang nagagwa gid ang mga ini kag nagatinguha nga mahatagan ang mas labing madamo.
Ginabaton man sini nga may sala sa mga programa nga ginpatuman kag ginawelcome man ang mga suhestyon sang mga kaupod nga opisyal.
Panugyan ni Tero nga magbinuligay nalang ang mga ini bangod indi manami nga mag-ilinaway ang mga opisyal sang gobyerno angot sa ginahatag nga budget.
Nagapangayo man ang DSSD head sang tsansa nga maserbehan ang pumuluyo sang Bacolod.
Samtang nagpalab-ot man sang pagpasalamat si Councilor Archie Baribar kay Tero bangod sa anum ka bulan na ini nga nagapangatubang sa pandemic.
Nagdangat pa sa nagpositibo ini sa virus kaupod sa iban pa nga mga empleyado sa DSSD para makaserbisyo sa mga pumuluyo.
Paathag man ni Baribar, kun magpadayun pa ang pandemya, indi masarangan sang isa lang ka persona ang pagpangatubang diri.
