Nagpanawagan ang Bacolod City Election Officer sa mga independent aspirants sa 2025 Midterm Elections nga indi magdungan sa mga grupo sa pagfile sang Certificate of Candidacy (COC).
Sa interview sang Bombo Radyo Bacolod kay Atty Revo Sorbito, tag-isa lamang ang nagfile sa una nga duha ka adlaw sang COC filing, kag sa ikatatlo nga adlaw, wala gid sang may nagfile nga kandidato.
Suno diri, mas maayo nga hingalitan sang mga independent aspirant ang pagfile samtang matawhay pa ang venue sang filing.
Ini bangod may mga grupo nga ginapaabot na nga dululungan nga magafile sang COC sa natalana nga petsa kaangay lamang sang Team Asenso nga nag-anunsyar nga sila ang magafile sa ulihi nga adlaw sang filing sa Octobre 8.
Suno kay Sorbito, ang mga independent candidate ang personal nga nagafill-out sang form kag wala sang council nga nagacheck kun kompleto na ang mga requirements.
Gani mas maayo nga temprano nga magfile agud nga kun may kulang nga requirements, may-ara pa sang ligwa nga oras agud makacomply.
Dugang pa ni Sorbito nga kun magdungan ang mga independent candidate sa mga grupo, palarehas lamang nga magab-ihan ang mga kandidato kag mga personnel sang Commission on Election (COMELEC).
