Gintalakay sang Deputy for Medical Data and Analysis sang Emergency Operation Center sang Bacolod ang ginpagwa nga advisory sang syudad sang Bacolod nga “late hospitalization will lead to death”.
Sa interview sang Bombo Radyo Bacolod kay Dr Chris Sorongon, ang advisory ang nangin bunga sang consultative meeting kaupod ang mga infectious disease experts sang syudad.
Suno kay Sorongon nga nag-ayo ang Philippine Society for Microbiology and Infectious Diseases-Negros Occidental Chapter nga ginapangunahan ni Dr. Dolores Rommela Tiples-Ruiz nga mangin audience ang alkalde sang syudad kag katapo sang Emergency Operations Center kag nakita nila sa datos sang Covid cases subong nga tuig kag sang tinalikdan nga tama ka dako ang deperensya.
Sang tinalikdan nga tuig ang mga kaso kalabanan mild cases apang ang sa karun ang severe kag kritikal ang kaso bangud kinahanglan tubuhan, kinahanglanon sang hydro oxygen, kag kinahanglanon nga idal on sa Interior Care Units.
Nagakaalarma ang infectious disease specialist bangud sa klase sang mga pasyente ang nagakabatunan sang mga ospital sa syudad.
Nakita man nila nga kalabanan ang ginadala dala nalang nila apisar nga may ginabatyag na nga COVID like symptoms.
Ginpahayag man sini nga ang mga doctor ang nagalibot man sa nasari-sari nga ospital sa Bacolod gani nakahibalo ang mga ini sang sitwasyon.
Panugyan ni Sorongon sa mga pumuluyo nga may ginabatyag nga sintomas nga indi magkahuya nga magpadulong sa Bacolod Respiratory Outpatient (BRO) Center sa Bacolod Bays Center kun sa diin sarang makapakunsulta kag swab test sang libre.
Ginpahayag man sang Deputy for Medical Data and Analysis sang EOC nga masami sa mga ini ang ginadala sa ospital sa tion nga indi na mapunggan ang impeksyon nga nagatuga agud nga tubuhan ang mga ini, i-intubate kag pinakamalala, mapatay.
