Opisyal nga ginhatag sang alkalde sang Bacolod City kay Gen. Melquiades Feliciano, Inter-Agency Task Force (IATF) Deputy Impementer sa Visayas ang pagpamuno sa ipatuman nga Executive Order No. 59.
Sa exclusive interview sang Bombo Radyo kay Mayor Evelio “Bing” Leonardia, ginrekomendar ni Feliciano ang paghuman sang Bacolod City Emergency Operations Task Force nga amo man ang ginhimu sang team sini sadto sa Cebu.
Nahibaluan nga ang team ni Feliciano ang kaupod sa nagbulig sa Cebu sang mga tini-on nga nagadangat sa 300 ang kaso didto sa kada adlaw, apang bangod sa mga implementasyon ang yara nalang sa karun sa single digits.
Ginalauman naman nga mag-ayo ang sitwasyon sa ciudad sa giya nanday General Melquiades Feliciano, Environment Secretary Roy Cimatu kag Presidential Assistant for the Visayas nga si Secretary Michael Lloyd Dino pinaagi sa eksperyensya sa Cebu bilang basihan.
Ang organized emergency operations center ang ibutang sa Maskara Hall sang New Government Center (NGC) nga nakita nga isa ka strategic location bangod yara na nadaan ang mga pasilidad.
Ginakinahanglan naman nga may-ara ini sang tawo 24 oras bangod may mga tini-on nga may mga nagapanawag sa kagab-ihun para dal-on sa ospital.
Ang mga delegates ang ginpadala kasunod sang sulat sang alkalde kay President Rodrigo Duterte kag Senator Bong Go sa pagpangayo sang bulig.
Nagapasalamat naman ang alkalde nga una nga ginhatagan sang atensyon ang ciudad.
Nagapati naman si Leonardia nga apisar indi mahapos, pero bangod sa nangin madinalag-on ang polisa sa Cebu, dako ang posibilidad nga mangin madinalag-on man sa atun.
Ang gintalana nga game plan amo ang pagdala sang sang pagpakig-away sa tagsa ka mga barangay.
Dapat naman nga kilalahun kun ano nga Barangay ang bululigan kag kun diin dapat nga gamitun ang mga resources.
Sa oras nga ma-identify na ang mga ini, gilayon naman nga ma-isolate kag mapahagan-hagan ang paglapta sang balatian.
Ginaproblema naman sa karun ang mga asymptomatic nga sarang makalatun sa mga may co-morbidities.
Makapila naman nga ginasulit-sulit sang alkalde kag nagapati ini nga nangin kabahin na sang common sense sang tanan nga sa ulihi, ginakinahanglan gid ang bulig, suporta, kag kooperasyon sang mga pumuluyo.
