Nagapasalamat ang fire marshal sang Bacolod City Fire Station nga manubo ang narekord nga mga fire incidents sa bulan sang Marso kun ikumparar sa nagliligad nga tuig.
Sa interview sang Bombo Radyo kay Fire Chief Inspector Rodel Legaspi, nagapasalamat ini bangud apisar nga ila ginalauman nga magadamo ang fire incidents sa bulan sang Marso, nga amu ang Fire Prevention Month, mas nagnubo ang numero sini kun ikumpara sa nagliligad nga tuig.
Santo sa dapat sang BFP, sang Marso 2020, 34 ka mga fire incidents ang nagluntad kag may balor sang halit nga P2,019,581 samtang sang tuig 2021 sa kaangay nga bulan, nagdangat naman sa 21 ka mga fire incidents ang nagluntad kag P573,000 ang balor sang halit.
Sini nga Marso 2022, nakarekord ang BFP-Bacolod sang 25 ka mga fire incidents nga may balor sang halit nga P205,100.
Suno kay Legaspi, sang tinalikdan nga bulan, walo ka mga electrical fire ang narekord, walo man ka mga grass fire, isa ka storage fire, isa ka commercial fire, kag lima ka residential fire.
Nagakakit-an man sini nga mas nangin epekto ang kampanya batok sa sunog subong nga fire prevention month kun ikumparar sa nagliligad nga tuig kag isa sa ginalantaw nga rason amu ang partnership sa nagkalain-lain nga sektor tuhoy sa fire prevention.
Nagapadayon man ang ila mga programa sa mga kabarangayan tuhoy sa pagtukdo sang mga fire brigade volunteers agud mangin first responders in kaso nga may magluntad nga sunog.
Ginakalipay man sini nga may yara na sang substations sang BFP sa Barangay Taculing, Barangay Pahanocoy kag Barangay Handumanan.
Apisar nga indi mahambal nga zero fire incidents ang Bacolod sang tinalikdan nga bulan, ginapasalamatan sang fire marshall nga wala sang may nagluntad nga dako nga sunog kag wla man sang kabuhi nga nadula.
