Nakaalerto na ang Bacolod City Fire Station para sa nagahilapit nga tigkalalag sa Nobyembre 1 kag Barangay kag Sangguniang Kabataan elections sa Lunes.
Sa interview sang Bombo Radyo kay Senior Fire Officer 4 Jereck Barbas, deputy fire marshal sang Bacolod City Fire Station, iya ginpahayag nga sa idalom sang Oplan Kaluluwa, nagpatigayon ang BFP sang inspection sa mga terminal kag pantalan bangud ginalauman ang pagdagsa diri sang mga byahero nga magapauli agud nga mag-obserbar sang All Saints Day kag All Souls Day.
Nagpatigayon man sila sang recorida agud nga maremind ang mga pumuluyo nga maghalong sa pagsindi sang kandila sa sulod sang balay agud nga malikawan ang sunog kag siguruhon man nga may nabilin nga tawo sa puluy-an kun magpadulong sa sementeryo.
Nagpangabay man ang mga ini nga ipaiway nalang ang pagsindi sang kandila sa altar sa balay kun ililikit ang mga pamalay sa ginaistaran.
Madumduman nga madamo ang napatay sang nasunog ang isa ka boarding house sa Barangay 19 bangud sa ginsindihan nga kandila, pila na ka tuig ang nakaligad.
Ang recorida ang ginpatigayon sang city fire station kag walo ka sub-stations sa ciudad sang Bacolod.
Mangin red alert status ang BFP para sa Oplan Kaluluwa sa Oktubre 30, apang sa karon, nakared alert status na ang mga ini para sa Barangay kag Sangguniang Kabataan elections sa Lunes, Oktubre 30.
