Ginpaidalom sang National Inter-Agency Task Force sa modified enhanced community quarantine (MECQ) ang Bacolod City, subong man ang Lanao del Sur sumugod subong nga adlaw, Setyembre 8 tubtob Setyembre 30, 2020.
Sa ginapatigayon nga meeting sang national inter-agency task force against COVID-19 kagab-i, ginrekomendar ni COVID-19 Task Force Chief Implementer Carlito Galvez Jr. kag DOH Secretary Francisco Duque III kay Presidente Rodrigo Duterte nga ipaidalum ang ciudad sang Bacolod sa modified enhanced community quarantine (MECQ) santo sa rekomendasyon ni Environment Secretary Roy Cimatu kag General Melquiades Feliciano nga nagbisita diri sa ciudad sang tinalikdan nga sinemana.
Suno kay Duque, sa impormasyon nagikan kay Mayor Evelio “Bing” Leonardia, 462 ka panibag-o nga kaso ang narekord sang nagligad nga apat ka adlaw kag may average nga 135 ka mga kaso kada adlaw.
Gani hugot sini nga gina-endorso ang rekomendasyon ni Cimatu kag Feliciano nga pagpataas sang quarantine status sang ciudad.
Suno kay Mayor Evelio ‘Bing’ Leonardia, ang pagpasaka sang quarantine status sa ciudad ang desisyon sang national IATF kag dapat nila nga ipatuman.
Sa karon, wala pa sang executive order si Leonardia apang ginalauman nga magagwa ini anuman nga oras sini nga adlaw.
Bangud sini, naghingyo si Leonardia sa mga Bacolodnon nga magkooperar sa mandu sang IATF.
