Ginpaidalom na sa State of Calamity ang ciudad sang Bacolod bangod sa kahalitan sang Red-striped Soft Scale Insect (RSSI).
Sa interview sang Bombo Radyo Bacolod kay Bacolod City Councilor Thadeus “Thaddy” Sayson, chairperson sa Committee on Agriculture and Fisheries sa Sangguniang Panlungsod, nadesisyonan ang pagdeklarar sang State of Calamity sa regular session agud magamit ang Quick Response Fund sa madasig nga paghatag sang bulig sa mga sugarcane planters kag sugarcane workers.
Suno sa konsehal, sa 3,000 hectares nga katubuhan sa Bacolod City, yara sa 2,000 hectares ang apektado sang RSSI.
Pahanumdom ni Sayson nga ang RSSI ang kaangay sang tigi nga nagatapik sa dahon, kag ginasuyop sini ang duga sang tanom gani nagakakaya ang dahon.
Suno diri, kun malaya ang dahon mapatay man ang tanom bangod indi na makaphotosynthesis kag makakuha sang nutrients ang tubo.
Gani ang RSSI ang masami nagatuga sang pagkuritot sang tubo ukon ang mas malala amo ang pagkapatay mismo sang tubo.
Pinaagi sa pagdeklarar sang State of Calamity mas mangin mahapos kag mas madasig na ang pagresponder sa kahalitan sang RSSI.
Kalakip na diri ang paghatag sang mga bulong ukon chemical pesticides batok sa RSSI ukon ang gindevelop nga patdan nga may resistance na sa RSSI.
