Aminado si Bacolod City Administrator Atty. Pacifico Maghari III nga dapat mahibaluan sang mga pumuluyo ang schedule sang pagpick up sang basura sa ila lugar agud makolekto ini sang maayo.
Gin-ako sini nga may issues angot sa delayed nga pagpick up sang basura gani ginreview nila ang schedule kag gin-identify kun ano nga mga eskinita nga indi masudlan sang truck sang private garbage hauler nga IPM Construction and Development Corporation.
Suno diri, kun eskinita, barangay ang mapick up kag dal-on sa malabayan sang truck gani dapat mahibaluan sang mga pumuluyo ang oras sang paglabay sang collector.
Sa karon, 60 ka truck ang operational sa mga ginagamit sang IPM Construction and Development Corporation.
Tinguhaan naman sang city government nga makahimo sang mobile app para sa pick up sang basura nga real time ang booking sang pagkolekta nagikan sa mga pamalay.
