Ginalantaw sang Bacolod City government ang posibilidad nga makabulig ang pribado nga mga kompaniya agud mabuhinan ang kulang nga COVID vaccines.
Sa Zoom interview sang Bombo Radyo Western Visayas kay Mayor Evelio Leonardia upod ang mga gobernador sa Region 6, ginkumpirmar sini nga nakabayad na ang city government sang P31 milyones nga down payment sa AstraZeneca nga patimaan nga ginabaton na sang pharmaceutical company ang order nga 650,000 doses sang bakuna.
Wala pa sang final schedule sang delivery nga ginhatag ang AstraZeneca apang ginalauman sang city government nga magaabot ini sa 3rd quarter sang tuig ukon sa bulan sang Hulyo.
Aminado ang alkalde nga madamo ang mga ciudad nga nagaorder sa karon sa AstraZeneca gani dako ang demand.
Suno kay Leonardia, may pila ka private companies sa Bacolod nga nagpahayag nga sila ang magabakal sang bakuna para sa ila nga mga empleyado nga bulig sa city government agud mabuhin-buhuinan ang kulang nga 99, 000 doses.
Sa kaangay nga interview, ginpasalamatan man ni Iloilo City Mayor Jerry Treñas ang chairman sang Bombo Radyo Philippines nga si Dr. Rogelio Florete, sa paghatag sang P1 million nga donasyon sa gobyerno para sa procurement sang COVID vaccines.
Suno kay Treñas, dako ang bulig sang private sector agud nga malab-ot ang target nga populasyon nga mabakunahan agud nga malab-ot ang herd immunity.
