Ginatinguhaan sang Bacolod nga mapadamo ang mga isolation facility agud nga maakumudar ang tanan nga mga magapauli ilabi na ang mga pumuluyo nga maga-positibo sa COVID-19.
Suno kay City Administrator Em Ang, pinuno sang Emergency Operation Center (EOC) sang ciudad, nagasegi ang pag-abot sang mga overseas Filipino workers (OFWs) kag locally stranded individuals (LSI) sa Bacolod.
Naintindihan naman ini sang City Administrator bangod wala naman sang iban nga makadtuan ang mga residente sang Bacolod.
ginapasalig naman ni Ang nga makapauli kag pagabatunon ang mga ini.
Paathag sini nga igapaidalum gihapon sa swab test ang mga magapauli kag ipaidalum sa quarantine tubtob sa maggwa ang resulta.
Kun magnegatibo gilayon naman ang mga ini nga papaulion, samtang kun mag positibo naman gilayon nga igasaylo sa isolation facility.
Sa karun,may-ara na sang 500 nga mga bakante nga beds ang ciudad para sa mga positibo sa COVID-19.
Pahayag man sini nga gina-upod ang mga taga-Bacolod kun may-ara sang flight nga gin-arrange ang probinsya.
Ang ciudad naman ang nagasalo sa mga naga-abot nga OFW bangod nag-untat na ang Overseas Workers Welfare Administration sa paghatag sang assistance.
Nagapangabay naman si Ang nga magalab-ot ang ensakto ngs mga data sa information operation center agud nga mas mangin mahapos ang contact tracing.
Matapos naman sang 14 ka adlaw nga mapaidalum sa isolation, magahatag man ang ciudad sang clearance agud nga makabalik na sa tagsa ka mga trabaho.
Ginaproblema naman sa karun ang kakulang sang naga-operar nga critical health unit nga nagatuga kun ngaa madamo sang mga nagapangita sang ospital ang wala sang nagabatun bangod dyutay lang ang nasambit nga pasilidad.
Samtang ginpaathag man sang City Administrator nga sarang makasulod sa Bacolod ang may mga trabaho nagikan sa probinsya, kag ipakita lang ang mga ID.
Apang ginpahayag man sini nga kun ang rasun lang sa pagsulod sa Bacolod amo ang paglagaw, indi ang mga ini mapahanugutan sa pagsulod.
Samtang ginapadangat naman sa nangin meeting sa ciudad ang nahanungod sa pagtsekyar sang mga kapulisan sa Border Check-Up Points sa mga OR/CR sang mga salakyan, apesar indi na kabahin sang ila nga jurisdiction.
