Preparado na ang ciudad sang Bacolod para sa Masskara Festival 2023 subong nga Oktubre kun sa diin pagahiwaton ang official opening sa Bacolod City Government Center sa Biyernes.
Sa interview sang Bombo Radyo kay Councilor Jason Villarosa, chairman sang committee on tourism sa Sangguniang Panlungsod , normal lamang ang ginpreparar nga progarma kag countdown para sa opening kag wala na sang parade ukon motorcade nga patigayonon nga makadisturbo sa trapiko.
Suno diri, yara ang city officials sa selebrasyon kasubong man ang mga bisita kag mga artista.
Apang, para sa highlights sang Masskara festival, gin-ako sini nga may yara sang invited nga mga bisita nga naggikan sa national dignitaries kaangay na lamang sang first family, kun sa diin kumpirmado na nga magapadulong diri si Fisrt Lady Liza Marcos kaupod ang isa ka bata sini, samtang indi pa man masiguro kun makatambong si President Ferdinand Marcos Jr apang kumpirmado nga wala si Congressman Sandro Marcos.
Ginalauman man ang pag-abot ni Senator Risa Honteveros kag mga bisita naggikan sa Philippine council sa New York.
Samtang, para naman sa Festival sites, yara ang Bacolod Government Center, Bacolod Public Plaza, SM Mall, Old Airport para sa ikaduha nga semana kag Lacson Street para sa ulihi nga semana apang wala pa nahibaluan kun tatlo ukon apat ka adlaw ang pagsira sa dalan-Lacson.
