Ginkumpirmar ni Bacolod City Mayor Evelio “Bing” Leonardia nga magasunod ang ciudad sa mando sang national inter-agency task force (IATF) nga indi na kinahanglan nga magpaidalom ang Bacolod sa Community Quarantine sumugod sa Mayo 16.
Ini ang kasunod sang pagtumod sang IATF nga isa sa mga low risk areas ang Region 6.
Sa interview sang Bombo Radyo Bacolod kay Leonardia, ginpahayag sini nga gilayon siya nagpatawag sang emergency meeting agud nga hambalan ang nasambit nga deklarasyon sang national IATF.
Ginkumpirmar sini nga nakabaton na siya sang inisyal nga impormasyon sang Lunes sang gab-i angot diri, apang opisyal ini nga gin-anunsyar kahapon.
Suno sa alkalde, apisar nga wala na sang community quarantine ang ciudad, magapatuman ini sa gihapon sang “minimum health standards” nga sundon sang tanan.
Ginpangabay man sini si Vice Mayor El Cid Familiaran kag ang Sangguniang Panlungsod nga magpreparar sang mga ordinansa nga permanente nga sundon sang Bacolodnon.
Kaangay na lamang sang pagsuksok sang facemask, pag-obserbar sang social distancing sa tanan nga tion, curfew, kag ang pagpa-idalom sa mandatory 14-day quarantine sa mga OFWs nga magapauli sa ciudad.
Ginkumpirmar man sang alkalde nga padayon sa gihapon ang border check-up points sang kapulisan.
Suno sa iya, nagakadapat lang nga may yara sang mga ordinansa ang ciudad agud nga mapermanente ini nga sundon sang mga tawo.
Natalana man siya nga magpagwa sang transitory executive order agud nga indi magulpihan ang mga tawo sa pagkakas sang enhanced community quarantine.
