Lauman ang liwat nga pagpatigayon sang Bacolod City Government kaupod ang mga government agencies sang joint inspection para sa mga nagabaligya sang refillable butane canisters sa ciudad sang Bacolod.
Kahapon, 13 tanan ang mga market vendors ang nadakpan nga nagabaligya sang refilled butane sa Burgos Public Market sa joint inspection nga ginpatigayon sang Business Permit and Licensing Office, Bacolod City Legal Office kaupod ang mga personnel sang Bacolod Police Station 4 kalakip na si Burgos Public Market supervisor Cherry Aujero.
11 ang mga market vendors nga nakuhaan sang butane sa sulod sang Burgos Public Market, samtang may duha naman ka vendors nga nakumpiskaran sa gwa sang merkado.
Ginaklaro man nga ginkumpiskar gid bisan ang mga empty canister bangod ini ang mahimo ibalik lamang sang mga vendors sa supplier agud marefill.
Ang inspection ang ginpatigayon kasunod sang madamo nga mga sunog nga gintuga sang naglupok nga butane.
Nahibaluan nga sa Bacolod City Ordinance No. 885, ginadumili ang pagtughong, baligya kag paggamit sang refillable butane cannister, kag ang magalapas ang may multa nga P3,000 tubtob P5,000.
Suno diri, nakadepende sa CLO kun sila ang maga-issue sang notice of closure sa mga market vendor.
Ang departamento man ang magastore sa nakumpiskar nga mga butane canister apang ginalantaw nga sila ang makig-angot pa sa Bureau of Fire Protection (BFP) ukon sa Department of Energy (DOE) sa kun paano ang proseso sa pagdispose.
