Maga-apelar ang syudad sang Bacolod sang dugang nga bakuna para sa COVID-19 matapos nga diutay lang ang naga-abot sa syudad apisar nalakip sa ginhatagan sang prayoridad nga makabaton sang madamo nga bakuna.
Sa interview sang Bombo Radyo Bacolod kay Bacolod City Administrator Em Ang, ginpahayag sini nga kaina sang aga nag-abot sa Bacolod-Silay airport ang dugang nga 7,800 doses sang Sinovac vaccines nga gin-allocate para sa Bacolod City kag gilayon nga gindala sa cold room facility sang syudad sa Government Center.
Suno kay Ang, luyag nila mahibaluan kun ngaa diutay ang mga nag-alabot nga bakuna komparar sa iban nga Local Government Units (LGUs) apisar nga kun panumdumon mas mataas ang COVID case sang syudad.
Ginpahayag man sang city administrator nga kada semana may yara man sang nagaabot nga bakuna sa syudad.
Nahibaluan nga kabug-usan nga 39,800 Sinovac doses na ang nabaton sang Bacolod City sa bulan sang Hunyo nagikan sa national government kun sa diin 10,000 doses ang nabaton sang June 5; 7,000 doses sang June 8; 15,000 doses sang June 23; kag dugang nga 7,800 doses ang nabaton subong nga adlaw.
Humalin sang Marso tubtob subong nga adlaw, nakabaton na ang Bacolod City sang kabug-usan nga 83,540 doses sang Sinovac kag AstraZeneca vaccines nagikan sa national government.
As of June 24, ang COVID-19 Vaccination Council (Covac) nga ginapangunahan ni Mayor Evelio Leonardia, ang naka-administer na sang kabug-usan nga 58,339 Sinovac kag AstraZeneca doses sa mga residente sang Bacolod.
