Magahatag sang bulig-pinansyal ang ciudad sang Bacolod sa mga biktima sang serye sang linog sa Mindanao.
Suno kay Bacolod City Mayor Evelio “Bing” Leonardia, magahalin ang financial assistance sa pondo sang City Disaster Risk Reduction and Management Office (CDRRMO).
Dugang pa sang alkalde nga naka-istorya na sila ni Executive Assistant Joemarie Vargas, cluster head sang CDRRMO, nga magpatigayon sang pagpanalawsaw agud matumod kun pila ang ginahatag nga bulig sang iban nga mga local government units (LGUs) sa Mindanao agud may yara sila sang benchmark.
Nagpanugyan man si Leonardia sa mga punong barangay nga gilayon magpakig-angot sa city government kun may makita ang mga ini nga mga buildings sa ila nasakupan nga kinahanglan ipakaayo ukon gub-on.
Madumduman nga gintay-og sang tatlo ka mga mabaskog nga linog ang pila ka bahin sang Mindanao sang nagligad nga Oktubre 16, 29 kag 31 nga nagbilin sang 22 nga patay kag ginatos ka mga pilason.
